Una recensione sul giornale il lingua friulana "Il Diari"

“Petali di cristallo”, di Lia Carlin e “Sette e Quindici” di Anna Piazza

Doi gnûfs butui de floridure letararie di Glemone

Di un pâr di agns la produzion leterarie e sta metint lidrîs a Glemone.
No son pôcs, di fat, i glemonats contemporanis che si cimentin ta chest gjenar di culture. Diviers i
autôrs di saçs storics: di Tito Cancian a Alida Londero, Mauro Vale, Giuseppe Marini, Mariolina Patat. O cjatin po preseadis edizions fotografichis che a ripuartin oparis realizadis soredut di socis de associazion fotografiche glemonate. No mancjin autôrs di flabis: di Alberto Antonelli a Liviana Vitt, a Giuliana Pellegrini e altris.

Par no smenteâ une vore di poetis: Roberto Jacovissi, Toni Colussi, Luigi Treu e altris. Ma o cjatin ancje romanzîrs tant che Luciana Stefanutti, Lea Nicli D’Andrea, Renzo Brollo. Un sostanziôs panorame di autôrs e di oparis (strenzût dome par limits di spazi) dulà che a restin dâts une vore interessants: il grues interès pe leterature locâl e, pai setôrs des flabis, contis e romançs, la gruesse presince des zovinis gjenerazions massime par chel che al inten il mont feminin. Par ultimis, ma dome in ordin di timp, o cjatin dôs zovinis scritoris:
Lia Carlin e Anna Piazza che si son presentadis al public di Glemone ae fin de Istât passade:
Lia Carlin cuntune flabe.
Lia Carlin, insegnante tes scuelis primariis, e à vût chê di contâ ai siei frutins e a chei che a leiaran la sô opare, une moderne flabe dulà che l’amôr al cure ogni sorte di mâl e al rive a sorevivi ancje dulà che il glaç al somee impietôs viers i plui debils. Ae presentazion de opare, fate alì de galarie Openspace Le Monelle, e je vignude une vore di int, un grues grop di fruts e gjenitôrs che a àn preseât il lavôr comprant diviersis copiis. Une biele conte titulade Petali di cristallo, edit di Caravaggio editore, Gorgonzola (Milan), 48 pagjinis, 8 euros.

Anna Piazza, studente universitarie daûr a cjapâ la lauree in letaris, e à savût dâ il miôr di se metint dongje la fantasie ai valôrs de vite tal romanç Sette e quindici. Une storie di amôr, dulà che la vite de protagoniste e ven segnade dal orloi che, inesorabil, al conte lis oris e lis zornadis. Scrit in maniere semplice, facil di lei, al met dongje situazions classichis ma no scontadis dulà che une vore di zovins si ricognossin e che a àn dimostrât il lôr entusiasim intant de presentazion alì de galarie de Cinteche dal Friûl. Il libri al à 158 pagjinis, edit de cjase editore onlinwww.lulu.com, al coste 13 euros.
GIANFRANCESCO GUBIANI